ARABAK GAROÑA ITXI NAHI DU!!!!

Garoña ixteko eskatu dute Arabako hainbat erakunde eta gizarte eragileek

150 herri eragile baino gehiago, Arabako Diputazioa, Batzar Nagusiak eta Gasteizko Udala elkartu dira gaur, zentral nuklearra ixteko eskatzeko

BERRIA

Udalak, kontzejuak, kuadrillak, lanbide elkarteak, kirol elkarteak, kultur elkarteak, ekologistak... Era denetako kolektiboak elkartu dira Gasteizen, Arabako Diputazioarekin, Batzar Nagusiekin eta Gasteizko Udalarekin batera, PPri eskatzeko itxi dezatela Garoñako zentral nuklearra.

Horretarako prestatutako egitura batean puxika bana utzi du elkarte bakoitzak, Garoñaren kontra. Ordubete behar izan dute horretarako. Ekitaldiaren amaieran irakurri duten testuan, Garoñaren etorkizuna lau lagunek erabakitzea salatu dute. "Eskandalua" dela esan dute. Gasteiztik 40 kilometrora dagoen zentrala "Fukushimaren bikia" dela ekarri dute gogora.

"Garoñaren kontra gaudenok ez gara aurrerapen teknologikoen kontra gauden ezjakin batzuk; ekonomiaren irentsi nahi espekulatiboak gehiengoari egiten dion kalteaz jabetzen gara", esan dute.

EAJ.PNV

Garoñan biltegi nuklear bat egiteko proiektua salatu du EAJ-PNVk eta bertan behera uztea eskatu du, zentralaren irekiera ekiditeko

Eusko Legebiltzarrak Eusko Jaurlaritzari eskatu dio helegitea jar dezala Garoñako zentral nuklearrean behin-behineko biltegi nuklear bat ezartzea baimentzen duen ingurumen-inpaktuaren adierazpenaren kontra.

“Erreminta guztiak erabili behar ditugu Garoña berriro martxan ez jartzeko. Bere bizitza teknikoa gaindituta dago”, salatu du Juan Carlos Ramirez Escudero EAJ-PNVko legebiltzarkideak.

Legebiltzarkide jeltzalearen arabera, helburua da Garoñako Santa Maria zentral nuklearrean behin-behineko biltegi berri bat eraikitzeko proiektua ekiditea. “Lortzen badugu, eta biltegi hori egiten ez bada, Garoña berriro ez irekitzeko helburua gertuago izango dugu”, esan du Juan Carlos Ramirez Escuderok. EAJ-PNVko ordezkariak gogoratu du zentrala bere balio-bizitza gaindituta dagoela, 2011n 40 urte bete ondoren. “Europako zentraletatik zaharrena da, eta orain bere bizitza luzatu nahi dute, 55 urte bete arte. Garoña mehatxua da Arabarentzat, eta hondakin erradiaktibodun 30 edukiontzi baino gehiago eraikitzen badira, mehatxu hori biderkatu egingo da. Ingurumenari dagokionez, hondamendia da; baina, batez ere, pertsonen seguritasunerako arriskua da”.

Legebiltzarkide jeltzaleak gogora ekarri du Fukushimako zentralean 2011n izandako istripu nuklearra, eta sei urte beranduago, oraindik ere herritarrek pairatzen dituzten ondorioak. “80.000 pertsona bere etxera bueltatu ezinik dira eta 40 urte baino gehiago beharko dira erreaktorea ixteko. Inork ez du halakorik nahi Arabako udalentzat. Gaur, segurtasuna eta konfiantza ezari buruz hitz egiten ari gara, Garoñako segurtasun irizpide teknikoei dagokienez.

Eusko Legebiltzarrak, EAJ-PNVren, EH Bilduren eta PSE-EEren babesaz eta PPren aurkako botoaz, Iñigo Urkulluren gobernuari eskatu dio helegitea jar dezala materia nuklearrarentzako behin-behineko biltegia jartzea ahalbidetzen duen ingurugiro-inpaktuaren adierazpenaren kontra. Gainera, salatu du espainiako Gobernuak euskal erakundeekiko izandako informazio-falta, ez baitute kontsultarik ere jaso. Gasteizko ganberak Garoña desegitea eskatu du, eta Europar Batzordearen babesa eskatu du baldin eta azkenean jarduera berriro ekiten bada.